استنكار شامل !

بصراحة في كتير حكي احكيه , ومش عارف من وين ابلش , وصرت كاتب اكتر من رسالة وماحيها 

فتحت عمنا يوتيوب , وحطيت اغنيه ريلاكس وبلشت اقلب بالفيسبوك , لعلني ارى شيء يذهلني ويقنعني ويدهشني 

فتحت الفيسبوك لقيت ناس كاتبه عن التعليم , عن السياسة , عن ايمن عودة , في ناس عاملة شير لفيديو علي سلام كمان مرة , في ناس حاطة صورتها بمظاهرة سخنين , في ناس بعدها بتسب على مازن غنايم من اسا , وكمان مرة عن ايمن عودة , وبعدين عن انتخابات الهيئة الاسلامية بيافا , وبعدين عن حادث قتل بقرية عربية , وبعدين بيان القائمة المشتركة , بعدها بشوي افراد من التجمع كاتبين انه مش موافقين على بيان المشتركة , فنزلت كمان شوي لقيت ناس من الجبهة بعترضوا على حكي افراد التجمع الي معترضين على بيان المشتركة , وبعدها لقيت ناس مقاطعة الانتخابات كاتبه عن بيان المشتركة وكاتبه عن التجمع الي موقعوش على بيان المشتركة لانهم معارضينه , وبعدها لقيت نكتة بايخة , وبعدها اخبار عمليات الطعن الي قاعده بتصير بالبلاد , وبعدها بشوي لقيت بيان من النقب ضد هاي العمليات , وبعدها لقيت ايمن عودة كاتب ستاتوس , وبعدها لقيت ناس عاملة شير لايمن عودة وبتسب عليه , وبعدها لقيت ناس عاملة شير للناس الي عاملة شير لايمن عودة , وبعدها لقيت ابناء البلد بحكوا عن عضو رئيس بلدية ام الفحم الي شارك بمسيرة التعايش , وبعدها بشوي لقيت اصلا انه هاض عضو البلدية هو كمان عضو بحركة ابناء البلد , بعدها لقيت كمان فيديو عن كمان عملية طعن , وبعدها لقيت صور الشهداء الابطال , وبعدها لقيت صورة عبد الحكيم حاج يحيى , وبصراحة قعدت اتذكر اذا هاد عضو كنيست واي رقم بالقائمة المشتركة , وبعدها لقيت كمان مرة ناس بتسب على الجبهة , وناس بتسب على التجمع , والتجمع بسبوا على هدلاك , وهدلاك بسبوا على هدلاك 

فقمت وعملت فنجان قهوة , قلت الشغلة مش بسيطة وبدها فنجان قهوة وقعدة وبدنا نتطمن على الرعية بزبطش هيك ! 

قمت حطيت المي على النار , فتت تحممت على السريع , عملت القهوة , وقعدت  

فتحت الفيسبوك , لقيت  مروان صاحبي باعثلي رسالة انه اكتب عن شو صار معي من الصبح , قلتله هيك هيك , القيادة مبلشين ببعض , وهدلاك زعلانين على هدلاك عشين بند ببيان , وهناك شوي في مشاكل وهيك ! قللي اعمل منها قصة 

اجيت رجعت هون اكتب , فتحت الفيسبوك اشوف كمان اخبار عشين اعمل منها قصة ! لقيت ايمن عودة كاتب ستاتوس طويل , فتت قرأته , لقيته كاتب عن التعليم واهميته , وبعدها لقيت استنكار من المشتركة , وبعدها لقيت استنكار على استنكار المشتركة , فبطلت اعرف شو اعمل 

رجعت فتحت الفيسبوك , وبلشت اقرا هاي المقالات الطويلة تاعت الناس الفهمانة المثقفة , لقيتهم كمان بستنكروا ! ههه 

ولكوا ايش فيه , لي الكل بستنكر , والحلو انه هدلاك استنكروا , بس الجماعة التانيين مش عاجبهم الاستنكار ! فاستنكروا الاستنكار الي استنكروه هدلاك لانه الاستنكار اصلا معجبهنش وهني بدهنش يستنكروا هيك ستام , فاستنكروا الاستنكار الي جاي من فراغ لانه الاستنكار يدل على نكر الفعل , ونكر الفعل يدل على استنكاره من قبل المستنكرين الجالسين الفهمانين المثقفين الذين يستنكرون بيانات استنكارية من حقها استنكار هذه الاعمال المشينة التي نستنكرها جدا جدا !

متهمي شفاعمرو الابطال

المجزرة :-

في تاريخ 4.8.2005 قام الجندي الارهابي ناتان زادة ( من مستوطنة تبون-الضفه الغربيه ) باعتلاء باص ايجد رقم (165) اللذي يصل شفاعمرو , ومع سبق الاصرار قام الارهابي ناتان بقتل اربعة ابرياء واصابة ثلاثة عشر شخص من سكان شفاعمرو –فلسطيني الداخل .

اسماء الشهداء :- الشهيده هزار تركي (23 عاما) ,,, الشهيده دينا تركي(21 عاما) ,,, الشهيد ميشيل بحوث(56 عاما) ,,, الشهيد نادر حايك(55 عاما) .

قاموا وزراء في الحكومة الاسرائيليه بادلاء ادعاء ان الارهابي زادة قام بقتل الشهداء الشفاعمريين لانه اراد وقف عملية " انسحاب "الجيش الاسرائيلي من قطاع غزه عن طريق قتل فلسطينيين عرب , ولهذا , وبهذه الحجه قام بقتل 4 ابرياء من فلسطيني الداخل ليعلن موقفه تجاه ( خطة الانفصال ) .

طبعا , في ذلك اليوم قاموا اهالي شفاعمرو الابطال بقتل الارهابي ناتان زادة وهو موجود داخل الباص دفاعا عن بلدهم وارضهم , ولولا انهم لم يقتلوه , لكان الارهابي قتل العديد ممن كانوا موجودين في الباص .

اتهمت المؤسسة الصهيونيه 7 شباب ابطال من سكان شفاعمرو بقتل ناتان زادة , حين ان الملف التاني الذي كان من المفروض ان يبحث فيه لماذا قام زادة بارتكاب هذه الجريمه ومن قام بمساعدته قد اغلق مؤخرا , وما زال ملف الشبان السبعه مفتوحا .

----

دعم جماهيرنا العربيه :-

من سنة 2005 حتى اليوم يقام في تاريخ 4.8 مسيرة حاشده لذكرى الشهداء الاربعه , ولكن متهمي شفاعمرو لم يتلقوا الدعم الكافي من بلدهم ومن مجتمعنا العربي , بحيث ان محاكمات المتهمين كانت تحوي المتهمين والاصدقاء وفقط .

في الفتره الاخيره , الحراك الشبابي بشفاعمرو , عبر شبكة التواصل العالميه (الفيسبوك ) اقام مجموعة باسم (تضامنا مع شباب شفاعمرو المتهمين بقتل الارهابي ناتان زادة ) وهي عمليا مجموعة دعم للمتهمين الابطال , ومن خلالها يناشدون جماهيرنا العربيه بقدومهم الى المحاكم ورفع المعنويات .

لجنة المتابعه العليا , بعد 7 سنين !! قامت بتبني القضيه ( بكير ) , وايضا لم يتبنوها كما يجب , حيث انهم لا يتواجدون في كل المحاكم.

صحافتنا العربيه , لا ادري اذا كانت الصحافه العربيه ما زالت تتذكر ان القضيه مستمره وان عليهم تغطيتها ليست فقط بالمحاكم , انما بشكل عام .

----

المتهمين الابطال :-

يذكر ان المتهمين لا يعملون اليوم لكثرة المحاكم والتحقيقات , بحيث انه اصبح وقتهم ملك لحكومة الاحتلال ولا يتسنى لهم العمل وكسب العيش , لذلك , نحن ابناء الحركه الوطنيه , ابناء فلسطين , يتوجب علينا مساندة ابطالنا ودعمهم , سواء في المحاكم او خارجها , لنظهر للمؤسسه الصهيونيه ان شبابنا ليسوا وحدهم , سندافع عمن دافعوا عن ارضهم وبلدهم , سندافع عمن اوقفوا الارهابي بقتل المزيد.

اسماء المتهمين ومهنهم :-

جميل صفوري ( ابو الانيس ) , عامل بناء

باسل خطييب , عامل بناء

نعمان بحوث , ميكانيكي سيارات

اركان كرباج , دهان

باسل قدري , اعمال ترميم

منير زقوط , ميكانيكي سيارات

نزار نصرالله , دهان سيارات 

-----

وكلمة حق لا بد من ذكرها وتوضيحها , ان السيد مراد حداد ابن بلدة شفاعمرو الابية , كان دائما مرافق ومتابع للمتهمين الابطال اللذين بدورهم شكروه على مساعدته الدائمة  . وطبعا يوجد الحراك الشبابي الداعم لمتهمي شفاعمرو يتابعون القضية والحراك ناتج من عدة احزاب وحركات سياسية , مثل ابناء البلد , التجمع , الجبهه واخرى مؤسسات وحركات . 
اتمنى انني استطعت ان اوصل رسالتي وهي , ان قضية مجزرة شفاعمرو لا تقتصر على بلدة شفاعمرو فقط , بل على شعبنا الفلسطيني كافة , فناتان زادة موجود في كل الشوارع الفلسطينيه , والمؤسسه الاسرائيليه من هدفها ان يكونوا شبابنا لوحدهم , فلنقهر المؤسسه الصهيونيه ولنتواجد جانب ابطالنا 

معا على درب الحريه

 

زئفولهم يا جدعان

عندك تجربه ؟

يعني معروف انه دولة اسرائيل وعنصريتها الحلوه بتمنع فلسطيني الداخل يشتغلوا بكل المجالات .
مش بالضروره مجال عالي , لا ممكن بمحل كنادر تشتغلش , لأنه بكل بساطه بتكون ماشي وتدور على شغل , بتشوف محل كنادر , بتلاقي لافته " بعد الجيش " يعني انه مش لالنا الشغل , فبتمسك حالك وبتنقلع من هناك .
اسا ممكن اشي تاني , ممكن تكون خادم جيش (تفي) فبتفوت علمحل وبتقوله مرحبا بدي اشتغل , بتطلع على شكلك ( اشكرا عربي ) بقولك خيا بس بعد جيش لازم , فبتقوله وانت واثق من حالك اوي " انا خدمت جيش" فبقولك اسمع اسا احنا مش عاوزين اسا , بس يعني بتقدر تحط تفاصيل وبنرجعلك , وطبعا على الدنيا السلام , بدي اشلح وادور اذا برجعولك !.
اسا الحلو الاكتر بهاي الدوله , انه كلشي بده تجربه , يعني ممكن تشتغل بالزباله ويقولك لازم يكون عندك تجربه ! طيب انا كيف بده يكون عندي تجربه وانت مش مخليني اجرب , يعني انت بدك اياني اشتغل واكون عندي تجربه ! واللي بعدك نفس الشي , وهداك نفس الشي , وبالمحل الفلان نفس الشي ! طيب ياخي خليني اجرب عشين يصير عندي تجربه ! .
فاستنتجت انه بتروح علمحل وبتقولهم عندي تجربه ! اسا هون الحيونه , انه يقولك جيبلي ورقه وين اشتغلت ! طيب خلص يعني فك عني !
بكفيش مش معطيني اجرب , وبدك ورقه اني مجرب ؟ اي شو انا طيار ؟ كلها شغله وبوخد الحد الادنى من الاجار !
طيب انت هون بتصل لمحل انك بتوقف , بتشتري علبة اكس ال , وبتدخن سيجاره , بتسمع ديكائون , بتحط اجر على اجر , وبتقول بثقه " مليش الا العمار " بتتصل على ابو ممدوح وبتقوله انا نازل معك عمي بكرا , بقولك طيب , بس اشتغلت بالعمار قبل ؟ بتصير تقول انت بعقلك " يلعنننن , اخرى هاي بدها تجربه " لا عمي فش عندي تجربه , بدك اشتغل ؟ طبعا ابو ممدوح بده حدا يحرث عليه قبقولك اه حبيبي بكرا عل 5.30 بتكون واقف قدام الدار , بيجي ممدوح يوخدك .
بتروح علفيسبوك انت بتكتب ستاتوس " يلعن دين العمار , العمار دمار يا جماعه بس بهمش بدي اشتغل " فهون بوخده عنك فكره انك انسان كادح قوي وبدك ترتزق , بتنزل تاني يوم , بنطلون جديد مش موسخ ( لانه فش تجربه ) قاعد عل " سيدنيت " وبايدك كاسة القهوه وبستنتى , بيجي ممدوح يا دوبه مفتح عينيه , بتطلع بتقول صباح الخير . طبعا محدا برد عليك ! بكونوا عايفين حالهم ومش نايمين , وانت بتحط حالك وبتنام .
بتصل محل الشغل , بتنزل العده , ببلش النعس يدب فيكي , وبتحس جسمك مهدود ! بهمش , بتحط راسك انه بدي اجرب اشي ! بتحمل هلطريه والشاكوش , وبتبلش تخبط , اضرررررب يابا , على الاستراحه بتروح بتوكل , بتلاقي امك حاطه عجه ! طيب انا بديش عجه , ليييي العجه متلا ؟ بديش عجه ! حدا بوكل عجه بالشغل ؟ طيب شو بدك حبيبي يعني ؟ مقلوبه متلا ؟
بيجي وقت الصبه ! بتصب هلباطون , ببلش جسمك يقت , ايديك بصيروا خشنات , خشمك مليان باطون من جوا , عينك حمرا من النعس , شعراتك صاروا مجعدات , واجريك عرقانات !
بتروح علدار , طبعا امك مكيفه عليك ويمكن صارت مخبره نص البلد , ابني بشتغل بالعمار , صار زلمه!
بتروح علدار , بتلاقي الاكل جاهززز , الا بتحس حالك بالجنه لشي لحظه , بتقعد بتوكل وانت بعدك بتسمع بدينك صوت الجباله وهي تنزل باطون , وبتصير تتخيل ممدوح بصيح عليك , وبتصير تحسب ابو ممدوح قديش بده يحاسبك ! وبتصير تتمنى انه بكرا تشتي عشين تنزلش علشغل وتنام .
هون بيجي دور الام الحنونه " يما , احكيلي , مبسوط بالشغل "
هون انت بتحكي درر وبتقولها " يما يا يما , اسا عرفت لي كل شغيلة العمار عرب , لانه كله بده تجربه وخدمه "

محتلين من كل النواحي

كتير شعوب محتله بهلعالم , بس بعرفش اذا هني احتلالهم زي احتلالنا.
يعني احتلالنا مميز , يعني مش بس قمع واضطهاد وقتل وقصف وهدم و وو  ,لأ كتير اشياء
يعني متلوا , احتلوا الاكل , يعني لما تروح على مدينه يهوديه وينطلك ابن كلب صهيوني يقولك פלאפל פלאפל ישראלי , يعني شو بدك تقوله هاض ؟ او بالاحرى كيف بدك تضربه , يعني بكفيش كل اللي بصير وحتى الفلافل , ولا شو كمان النكسه ؟ الحمص , مع اني بكره الحمص ( محدا يستغرب ) بس ياخي بتعز علي لما اشوف يهودي بتباهى انه بعمل حمص !

اسا مش هون التعريصه , التعريصه انه قبل فتره وأنا بالتعليم , بحكي انا وصبيه عن التبوله وهيك , فاجا واحد يهودي بعرفه بقولي والله زاكيه التبوله ! بقوله ااه زاكيه كتير ( كل فكري انه اكلها عند عرب ) بقولي والله صاحبتي بتزبطها , وامي بتعملها , واكلتها قبل فتره عند صاحبي ( عمليا هو كمل حكي وبلش يحكيلي عن التبوله وانا بسب عليه ) يعني بكفيش الفلافل والحمص , لا وكمان التبوله , بيجي يوم بصيروا يوكلوا مجدره !
اصلا من اسا اعرفوا , اذا اليهود سرقوا كمان اكل منا , معناته الحق على شاليط , لانه اكيد 5  سنين كان مفلس ويتعلم كيف بطبخوا وهيك.
ما علينا , اسا بكفوش سرقولنا اراضينا وبيوتنا , وقتلوا وشردوا , لأ !شو المصيبه , بوخدوا منك دخان
يعني بتكون قاعد بامان الله بمحطة الباص , ومعك سيجارتين , فبتطول سيجاره بيجي يهودي بقولك " ممكن سيجاره " اسا انت بتعرف انها اخر سيجاره وبتتعصبن لانه بدك تدخنها بعدين , بس طبعا النخوه والكرامه اللي فينا ( طزز ) بتمنعناش نعطيه , بنقوله تفضل , ولا في كمان هدول اللي كتيييير كريمين بعطوه قداحه كمان . وطبعا بصوت واطي خافت , بصوت خجول بقولك شكرا .
طبعا في كتير كتير كتير اشياء اليهود ماخدينها منا وسرقوها ونسبوها الهم .
بس توصل لدرجه يسرقوا افكارنا ؟ يعني انا كنت دايما مقتنع بمبدأ وبفكر معين , انه ييجوا اليهود يفكروا فيه كمان! هاي كتير كبيره !
يعني طول الوقت واحنا نقول فلسطين عربيه من الميه للميه , اسا ييجي يهودي يقولي اسرائيل يهوديه صهيونيه ! يعني لهون وصلت ؟
ومش بس هيك , حتى سرقوا فكرة كيف بدنا نقلعهم من هون , يعني من وانا صغير وانا اسمع " اليهود بعرفوا يسبحوا ؟ بدنا نزتهم بالبحر " اسا الغريب انه من نفس الشخص الخرا فوق حكالي رح ييجي يوم ونزتكم بالبحر , بس اسا تعلموا سباحه .
بس احلى احلى احتلال , هو المسبات
يعني كس امك صرت اشك اذا هاي عربيه , او منيك ! يعني بلاقيهم بسبوها وكأنها مسبتهم وماخدين راحتهم !
انا عارف , والله مش عارف
اسا في شغله محيرتني, عنجد بانيت الموقع العربي الاول ؟ 

محكمة رفاقي

ابطال شفاعمرو المتهمين بقتل الارهابي ناتان زادة مرتكب مجزرة شفاعمرو .

لأن هذه القضيه فلسطينيه , لان هذه القضيه قطريه ولا تتعلق فقط بشفاعمرو الابيه ,, لا هؤلاء الابطال دافعوا عن وطنهم

لان اسرائيل مليئه بناتان زادة , سنثبت للحكومة الصهيونيه ان رفاقنا ليسوا لوحدهم .

الجلسه المقبله يوم الاثنين , الحضور مهم جدا , على المحكمة ان تدرك ان هذه القضيه تتعلق بكل الجماهير العربيه الفلسطينيه ,, المحكمة يوم الاثنين الساعه التاسعه صباحا , في المحكمة المركزيه في حيفا , قاعة المحكمة غرفة رقم 616.

رأس سنه فلسطيني

2011
سنه مليئه بالمفاجئات على الصعيد المحلي , العالمي ايضا , منها المفرحه ومنها الحزينه , منها المثيره ومنها الطبيعيه.
لكن ما لم يفاجئنا هو استمرار الاحتلال الاسرائيلي ,, والصدمه اننا لم نفاجا الاحتلال بثورة , بمقاومة , كما فعلت الشعوب العربيه .

ها هو راس السنه يقترب , وكما تعودنا , ان نرى ملصقات في كل مكان " وسام حبيب , زهير فرنسيس , مصطفى دحلة , محمد أسدي " والعديد من المطربين , وكما تعودنا ايضا في رام الله , حفله لشريف الدرزي , ولسريت حداد !!!
لكن رفيقي اللذي اعتز به , علي عبيدات , كان صاحب فكرة راس سنه فلسطيني
ونحن الحراك الشبابي الفلسطيني , من كافة فلسطين , لا نقبل ان يكون هذا الشأن " راس سنه فلسطيني" فقط لرام الله وضواحيها , انما لكل فلسطين , من الميه للميه , فشاركنا علي والرفاق العمل على هذا الحفل الفلسطيني , العرس العربي , عرس يأبى التطبيع , اصوات فلسطينيه تابى الاحتلال الموسيقي ايضا , نحن نرفض سماع شريف الدرزي وسريت حداد .
فريم بنا بصوتها الجميل ستغني لفلسطين , وريم تلحمي ستغني لحق العودة المقدس , وزجل فلسطيني يروي لنا بعض من تراثنا الشعبي , باسل زايد ليدخلنا الى عالم الحب الفلسطيني , دار قنديل سيعرضوا لنا من خلال موسيقاهم قصة نعمان الفلسطيني , والعديد من الفنانين والفرق اللذين يأبوا التطبيع .
سنفتتح عام 2012 بوحدة الفلسطينيين من كافة المدن , نريد ان نكون في يومنا الاول من السنه مع بعضنا البعض , لنشدد على اهمية الدولة الواحده لفلسطين , فلسطين التاريخيه , فلسطين عربيه من الميه للميه .

على رام الله يا عرب , ثوار نحنا ثوار
علم واحد مش علمين
شعب واحد مش شعبين