بصراحة في كتير حكي احكيه , ومش عارف من وين ابلش , وصرت كاتب اكتر من رسالة وماحيها
فتحت عمنا يوتيوب , وحطيت اغنيه ريلاكس وبلشت اقلب بالفيسبوك , لعلني ارى شيء يذهلني ويقنعني ويدهشني
فتحت الفيسبوك لقيت ناس كاتبه عن التعليم , عن السياسة , عن ايمن عودة , في ناس عاملة شير لفيديو علي سلام كمان مرة , في ناس حاطة صورتها بمظاهرة سخنين , في ناس بعدها بتسب على مازن غنايم من اسا , وكمان مرة عن ايمن عودة , وبعدين عن انتخابات الهيئة الاسلامية بيافا , وبعدين عن حادث قتل بقرية عربية , وبعدين بيان القائمة المشتركة , بعدها بشوي افراد من التجمع كاتبين انه مش موافقين على بيان المشتركة , فنزلت كمان شوي لقيت ناس من الجبهة بعترضوا على حكي افراد التجمع الي معترضين على بيان المشتركة , وبعدها لقيت ناس مقاطعة الانتخابات كاتبه عن بيان المشتركة وكاتبه عن التجمع الي موقعوش على بيان المشتركة لانهم معارضينه , وبعدها لقيت نكتة بايخة , وبعدها اخبار عمليات الطعن الي قاعده بتصير بالبلاد , وبعدها بشوي لقيت بيان من النقب ضد هاي العمليات , وبعدها لقيت ايمن عودة كاتب ستاتوس , وبعدها لقيت ناس عاملة شير لايمن عودة وبتسب عليه , وبعدها لقيت ناس عاملة شير للناس الي عاملة شير لايمن عودة , وبعدها لقيت ابناء البلد بحكوا عن عضو رئيس بلدية ام الفحم الي شارك بمسيرة التعايش , وبعدها بشوي لقيت اصلا انه هاض عضو البلدية هو كمان عضو بحركة ابناء البلد , بعدها لقيت كمان فيديو عن كمان عملية طعن , وبعدها لقيت صور الشهداء الابطال , وبعدها لقيت صورة عبد الحكيم حاج يحيى , وبصراحة قعدت اتذكر اذا هاد عضو كنيست واي رقم بالقائمة المشتركة , وبعدها لقيت كمان مرة ناس بتسب على الجبهة , وناس بتسب على التجمع , والتجمع بسبوا على هدلاك , وهدلاك بسبوا على هدلاك
فقمت وعملت فنجان قهوة , قلت الشغلة مش بسيطة وبدها فنجان قهوة وقعدة وبدنا نتطمن على الرعية بزبطش هيك !
قمت حطيت المي على النار , فتت تحممت على السريع , عملت القهوة , وقعدت
فتحت الفيسبوك , لقيت مروان صاحبي باعثلي رسالة انه اكتب عن شو صار معي من الصبح , قلتله هيك هيك , القيادة مبلشين ببعض , وهدلاك زعلانين على هدلاك عشين بند ببيان , وهناك شوي في مشاكل وهيك ! قللي اعمل منها قصة
اجيت رجعت هون اكتب , فتحت الفيسبوك اشوف كمان اخبار عشين اعمل منها قصة ! لقيت ايمن عودة كاتب ستاتوس طويل , فتت قرأته , لقيته كاتب عن التعليم واهميته , وبعدها لقيت استنكار من المشتركة , وبعدها لقيت استنكار على استنكار المشتركة , فبطلت اعرف شو اعمل
رجعت فتحت الفيسبوك , وبلشت اقرا هاي المقالات الطويلة تاعت الناس الفهمانة المثقفة , لقيتهم كمان بستنكروا ! ههه
ولكوا ايش فيه , لي الكل بستنكر , والحلو انه هدلاك استنكروا , بس الجماعة التانيين مش عاجبهم الاستنكار ! فاستنكروا الاستنكار الي استنكروه هدلاك لانه الاستنكار اصلا معجبهنش وهني بدهنش يستنكروا هيك ستام , فاستنكروا الاستنكار الي جاي من فراغ لانه الاستنكار يدل على نكر الفعل , ونكر الفعل يدل على استنكاره من قبل المستنكرين الجالسين الفهمانين المثقفين الذين يستنكرون بيانات استنكارية من حقها استنكار هذه الاعمال المشينة التي نستنكرها جدا جدا !
